బంగారం కొనుగోలుదారులకు ఊరట.. తెలుగు రాష్ట్రాల్లో పసిడి ధరలు తగ్గాయి. హైదరాబాద్, విజయవాడలో 10 గ్రాముల 24 క్యారెట్ల బంగారం రూ.1,47,430గా, 22 క్యారెట్ల ధర రూ.1,35,140గా నమోదైంది. వెండి ధర కూడా స్వల్పంగా తగ్గి కిలో రూ.2,29,900కు చేరింది. ఢిల్లీలో 24 క్యారెట్ల బంగారం రూ.1,47,580గా ఉంది. ధరలు మారే అవకాశం ఉండటంతో కొనుగోలు ముందు తాజా రేట్లు పరిశీలించాలి.
ఇంటర్నెట్‌కు అనుసంధానమైన పరికరాల్లోకి చొరబడి, వాటి నుంచి ఇతర పరికరాలకు వ్యాపించే ఏఐ వార్మ్‌లపై ఆంథ్రోపిక్ నిపుణులు హెచ్చరిస్తున్నారు. స్మార్ట్ టీవీలు, సెక్యూరిటీ కెమెరాలు, రిఫ్రిజిరేటర్ల వంటి ఐఓటీ పరికరాలను ఇవి లక్ష్యంగా చేసుకోవచ్చని తెలిపారు. స్వయంగా వ్యాపించే సామర్థ్యం కలిగిన ఈ ముప్పు సైబర్ భద్రతకు సవాలుగా మారే అవకాశం ఉందని ఆందోళన వ్యక్తం చేశారు.
ఢిల్లీలోని కన్నాట్ ప్లేస్‌లో నిరసనలతో వ్యాపారాలు దెబ్బతింటున్నాయని రెస్టారెంట్ యజమాని ఆయుష్ చోప్రా హైకోర్టును ఆశ్రయించారు. అక్టోబర్ 10న జరిగిన ఆందోళనతో కన్నాట్ ప్లేస్‌లో రూ.150–200 కోట్లు, ఢిల్లీ వ్యాప్తంగా రూ.2,000 కోట్ల నష్టం వాటిల్లినట్లు పిటిషన్‌లో పేర్కొన్నారు. బాధ్యుల నుంచి పరిహారం ఇప్పించాలని కోరగా, విచారణను 27కు కోర్టు వాయిదా వేసింది.
అంటార్కిటికాలోని త్వైట్స్ హిమానీనదం అంచనాలకు మించి వేగంగా కరుగుతోందని పరిశోధకులు హెచ్చరించారు. వెచ్చని సముద్రపు నీరు అడుగుభాగంలోకి చొచ్చుకెళ్లడం వల్ల 2100 నాటికి సముద్ర మట్టాల పెరుగుదలకు దీని వాటా 30 మిల్లీమీటర్లకు చేరవచ్చని అంచనా. గ్లేసియర్ పూర్తిగా కూలిపోతే సముద్ర మట్టాలు 65 సెంటీమీటర్ల వరకు పెరిగే ప్రమాదం ఉంది.
విజయవాడ ఇంద్రకీలాద్రిపై సీఎం చంద్రబాబు, నారా భువనేశ్వరి కనకదుర్గమ్మను దర్శించుకున్నారు. దసరా శరన్నవరాత్రుల సందర్భంగా రాష్ట్ర ప్రభుత్వం తరఫున పట్టువస్త్రాలు, సారె సమర్పించి ప్రత్యేక పూజలు చేశారు. అనంతరం ఆలయ పండితులు వేదాశీర్వచనం అందించి తీర్థప్రసాదాలు ఇచ్చారు. ఈ కార్యక్రమంలో పలువురు ప్రజాప్రతినిధులు, అధికారులు పాల్గొన్నారు.
పుంగనూరు నామినేషన్ కేంద్రం వద్ద ఘర్షణలపై అన్నమయ్య జిల్లా ఎస్పీ ధీరజ్ స్పందించారు. నిబంధనలు ఉల్లంఘించి వాహనాలతో కేంద్రంలోకి వచ్చారని, ఘర్షణలో పలువురు గాయపడ్డారని తెలిపారు. చట్టాన్ని అతిక్రమించిన వారిపై కఠిన చర్యలు తీసుకుంటామని హెచ్చరించారు.
అధిష్టానం ఆదేశాల మేరకే ముందుకు సాగుతున్నామని జనసేన మున్సిపల్ అభ్యర్థి అద్దేపల్లి సౌజన్య తెలిపారు. బలం ఉన్న చోట స్నేహపూర్వకంగా పోటీ చేయాలని, న్యాయం జరగని పక్షంలో ఎన్నికల బరిలోకి దిగాలని అధిష్టానం సూచించినట్లు పేర్కొన్నారు. ఈ నేపథ్యంలో ఆమె మున్సిపల్ ఎన్నికల్లో పోటీ చేసేందుకు నామినేషన్ కూడా దాఖలు చేశారు.
